هل يمكنني الشراء من جروبات تلجرام الخاصة ببيع السلع بالجملة ؟ اين احصل على سلع بالجملة فالمغرب ؟ هل سيكون في المغرب عما قريب شركة للتوصيل تنوب عن الليفرورات ؟ هذا ما سنعرفه في هذا الموضوع من خلال هذا المقال الذي كتبه احد التجار القدامى و الذي يدلي بخبرته الطويلة في هذا المجال :
الإخوان ..واخا انا تنبيع فالدوريجين وبعيد على السلعة اللي تيخدمو بيها الأغلبية ديالكم ...وبما انني كثر من 9 سنوات وانا خدام فالتجارة ...نبغي نقول ليكم .... متشريوش من تيليغرام.... راه فيه غير السماسرية ... اقسم لكم بالله راكم غير تتضربو تمارة من أجل وحدين ناعسين مكسلين متيطلقو ads معندهم روتور ... حيث الناس ديال جملة ..معندهومش لوقت ديال تيليغرام اواحد نسبة كبيرة من الأرباح اللي تقدرو تنقصوها على المستهلك .. تتزيدوها باطل ..وتتمشي غير لسمسارة وغالبيتهم غير براهش مهاز ماشاري ماحاط ... وحتى بعض المحلات مين تيشوفوكم باقين صغار تيزيدو عليكم بزاف بزاف ....انا عارف بلي كاينين اللي مغيحملونيش نكتب هاد الشي ..ولكن ..الى كنتو بغيتو الطولو فهاد المجال ... خسرو بزاف الوقت باش باش تنبنيو علاقات مع الناس مالين السلعة الأصليين .... واش فنظركم مول الجملة الأصلي مسالي لصفحة تيليغرام .....، باغي تشري الجملة هبط اخويا لكازا ( كاراج علال و درب السلطان و القريعة و درب غلف و درب عمر و الدريسية و درب ميلا ) تماك دور مزيان و سول على راسك حتى اطيح فسلعة رخيصة و مزيانة ، والمشكل هو ان البراهش اللي تيبيعو ب199 و 299 تيصحاب ليهم راه مطورين ... اقسم لكم بالله الى راكم تتصنعو الثروة لوحدين اخرين واخا تكونو تتبيعو 300 كوموند فنهار ...لأن الغالبية ... باقي العقل ديالهم عامر بدوبامين ديال المراهقة ..وتتبان ليهم مليون تاهي فلوس ...راكم غير تتفركعو عينيكم باطل من اجل السماسرية و الشناقة و النصابة ...كاين فيكم بزاف اللي غيقول ...علاش هاد خونا تيكتب لينا هاد الشي.. نبغي نقول ليكم .... ديرو عقلكم ومتبقاوش تكتبو الأرباح ديالكم فالصفحات. ..را كاينين الشفارة وولاد $$$$ الي غيبقااو حاطين عليكم العين ..وهاد الشي حتى بالنسبة للدراري ديال التوصيل ...اللي جهلو أو ولّاو يطلبو ليك شي اثمنة خيالية.... راكم غتتخورو ..را فأي لحظة تقدر دخل شركات كبيرة وتقطع عليكم الما والضو ..كاينين مالين الشكارة ...اللي فلحظة يقدر يشري 10000 موطور ويدير شركة فلمغرب كامل ... ..ديرو عقلكم راكم غير تتطبلو فالما .ولكنتي تتربح شي حاجة ستر راسك وعرف مين تتشري ووطلبو من البايع factures ماشي بون وربح بلمعقول.
...سمحو ليا بزاف لا طولت عليكم حيث هادي business ماشي ديما غبتقا متاحة للجميع فأي لحظة تقدر تحبسها الدولة ولا تخليك تتجمع شي بركة ويقولو ليك اجي ابابا مين جاوك هاد الفلوس ...بحال اللي دارو لبزاف ديال شي وحدين كانو تيقولو مكاينش اللي عايق بينا.
وكيما تيقولو الناس لقدام ..الضعيف فالنمل تيجر سبولة
تعليقات
إرسال تعليق